終於收到箱啦

尋日終於收番曬所有嘅箱。43件完整無缺😃

而家畀個summary大家：

4Jan - 喺香港收曬啲箱
25Mar - 上船
26Apr - 去CBSA清關
27Apr - 啲箱送到嚟屋企

價錢方面, 我哋43個箱佔咗200cu ft.  你唔買所有document fees, custom clearance fees, 總數係HK$30,000。 價錢唔知道係貴定平，但最少冇要求加價。😉

我用Columbia嘅感覺都ok.  之前同我講要預計三至四個月到溫哥華都真係差唔多時間。

沒有家庭醫生？ 緊急及初級護理中心可以幫到你

啱啱嚟到溫哥華如果你仲未搵到家庭醫生, 又唔知道邊度有Walk-in clinic你可以試下搵你屋企附近嘅UPCC (Urgent Primary Care Centre) 處理不危及生命的疾病或受傷。例如：

扭傷及拉傷

割傷、傷口或皮膚病

發燒

感染（胸部、耳朵及泌尿道等）

哮喘

新出現或日趨嚴重的疼痛

較輕微的兒童疾病及受傷

日趨嚴重的慢性病

每一間UPCC嘅營運時間都唔同, 你最好打去你附近嗰間check清楚。

同埋最好早啲去，上次星期日佢哋5點鐘收工，但係12點鐘左右已經出咗notice話嗰日等候處理嘅case已經滿咗啦，唔再接新症。

申請MSP

返咗嚟兩個月, 落機第二日就即刻申請MSP。  Update吓最新申請情況, 希望個time line幫到大家:

• Jan 20th - online申請MSP (自己 - Citizen, 太太 - PR, 小朋友 - Citizen)
• Feb 21st - 打電話去Health Insurance BC確定佢已經收到個申請。佢喺電話度已經確認咗我同我小朋友個MSP會喺Apr 1st effective。太太嗰個佢話要收到PR卡之後先至可以去ICBC影相同埋個plan先至可以activate。我問佢如果未收到PR卡可以點?  佢當時話太早，叫我如果60日都未收到PR卡先至再打返上去。
• Mar 2nd - 收到Health Insurance BC寄嚟嘅信 (dated Feb 7th)。大致上同上面嘅update一樣。
• Mar 7th - 收到我嗰張BC Service Card同小朋友嗰張 （小朋友嗰張冇相)。
• Mar 21st - 今日夠60日再打上去Health Insurance BC, 佢幫我太太activate咗個temporary MSP (有效期半年 from Apr 1st）。佢叫我太太一收到PR card就去ICBC影相同攞BC Service Card。

加拿大用平價Data儲值卡(仲可以keep香港電話number)

大家都知加拿大mobile電話plan貴過香港好多（起碼CAD30/40一個月)。我回流之前發覺原來3HK有一張DIY儲值卡可以申請一個365日 30GB 外遊數據 （+5GB 外遊數據漫遊社交數據）都係HK$268。

呢張卡你仲可以將你香港用緊嗰個電話號碼過台高去3HK, 咁你嚟到就可以收到SMS啦。

Three.com.hk | DIY Prepaid

我兩個大人喺溫哥華就正常上咗Fido個plan, 但係小朋友部電話如果都想上台就真係覺得好貴。所以我就用呢一張3HK DIY儲值卡同埋download咗個Fongo app, 咁佢就會有個加拿大電話號碼, 有data嘅時候就可以打到/收到電話。咁做嘅話一個月加拿大嘅月費足夠我用一年。

順帶一提我發覺Fongo要喺加拿大境內先至可以register到。如果想喺香港要預先申請嗰個號碼, 咁就需要download Fongo World (~HK$38)。

如果唔係你亦都可以嘗試用TextNow, 但係我發覺如果要攞到個大溫地區area code嘅電話號碼，都係需要嚟到先至攞到。喺香港只係會攞到美國其他地區area code嘅電話號碼。

報名到返學所需時間 - Richmond School Board

我個仔今個禮拜一已經返學喇。由school board報名到返學究竟需要幾耐呢：

• 19Jan - Online Registration - Richmond School Board Website
• 21Jan - Central Registration email confirm registration completed.  但係唔知道catchment小學有冇位， 要等學校confirm。
• 21Jan - 收到email要做ELL assessment。去assess英文程度, 返學之後有冇特別英文support需要。（23Jan要做完）
• 28Jan - 收到學校電話。學校有位，可以星期一開學 (31Jan)。但係我個仔未夠12歲未打針所以根據travel restriction14日內係唔可以返學嘅。同佢講咗7Feb正式返學。
• 7Feb - 第一日返學

個仔返咗一個禮拜學真係好開心，識到啲新嘅朋友仔又有佢最鍾意嘅籃球打。佢應該已經適應曬啦。😄

IKEA - 有貨通知

IKEA

我諗好多回流人士都會去IKEA睇下有乜嘢傢俬。但係最近IKEA好多傢俬都冇貨, 問啲職員佢地亦都唔會知道幾時先至有貨返 （有時都唔係好睬你）。

有次同個職員傾嘅時候，佢淨係教識我原來可以喺網上版輸入你個email或者手機號碼，如果你件貨返咗貨嘅話就會收到通知。呢個feature係網上版 (or mobile Web page) 先至有，Apps係冇㗎 🤨

我最近買到張書枱都係因為收到佢嘅通知，之後即刻喺網上落單。2日之後就收到件貨啦。

平郵所需時間分享

如果大家仲記得, 我大概喺10月中用平郵send咗一箱衣物度溫哥華。咁佢總共需要幾多時間先至到達呢？ 我今日終於收到我嗰箱衣物 。

大家可以睇下我個time line：

日期及時間 *         地點        派遞狀況

12-10-2021 15:53 香港        已投寄郵件
18-10-2021 16:56 香港        已完成處理，等候付運
05-11-2021 14:50 香港        已交付運輸公司/出發前往目的地
31-01-2022 15:10 加拿大 送達處理中心(目的地互換局)
01-02-2022 22:16 加拿大 已離開海關／處理中心(目的地互換局)
04-02-2022 06:11 加拿大 送達派遞局
04-02-2022 14:13 加拿大 成功派遞

仲有大家都成日都會問究竟會唔會送到嚟屋企, 定係話要去郵局攞... 我依箱係送到嚟屋企嘅。我睇住嗰郵差一個人捧住呢30kg由driveway送到我門口😆

分享換領BC省車牌

之前已經提過如果你之前係持有BC省車牌, 回流後你係可以直接用香港車牌換返。我個BC省車牌已經二十年幾年前expired，亦都唔見咗同唔記得咗個號碼，今日我去ICBC都換得返。

大概嘅程序係：

• 預約去ICBC換證
• 帶備兩份身份證明文件
• 去到ICBC同個職員講returning to Canada 想攞返BC車牌（佢撳幾下電腦就搵得返我舊車牌嘅資料）
• 職員們問番我離開前地址 (和現在地址）
• 交出香港駕駛執照和TD320 （最後佢會收咗，如有需要請預先影印或影相）
• 做eye test
• 影相
• 畀錢$75

之後職員就畀個interim driver license畀我（正式license幾個禮拜後寄畀我)。

最後個職員同我講Welcome back to Canada ☺️

CoPR入境分享

今次返嚟溫哥華, 太太攞CoPR過嚟land。我哋去到香港機場check-in, 個地勤職員睇過我哋嘅CoPR, 核酸檢測報告, 疫苗記錄, ArriveCan之後都冇大問題。唯一係佢問我太太有冇eTA, 我記得之前喺網上睇過係話有CoPR係唔需要申請eTA嘅。個職員話唔清楚要再問下其他人，不過咁啱我太太有個幾年前申請咗嘅eTA仲未expire, 所以就畀咗嗰個紀錄嗰個職員睇。

因為今次我哋係坐AC，要喺日本轉機，轉機時間亦都需要做document check。喺日本嗰個職員亦都係要攞我太太個eTA睇。我哋冇攞出嚟畀佢睇，但係佢用電腦㩒幾下就睇到之前嗰個eTA。喺成田機場轉機，中間有三四個鐘頭時間。其實都有少量鋪頭有開門，平時想去嘅藥房，duty free，餐廳都有。有兩年冇去日本，呢個轉機時間都相當唔錯。

去到溫哥華入境，我哋攞完行李就要去immigration office幫我太太做埋landing，Goods to Accompany and Goods to Follow.  我哋等咗差唔多三個鐘先至排到我哋見officer。Landing嗰度就好快搞掂，佢話三四個月之後就會收到PR卡寄去我哋地址 (記得問佢confirm一次個地址)。個Goods to Accompany list, officer話既然都入咗加拿大佢唔會睇，就咁畀返份form我 (早知就唔嘥時間做依個list同幫啲物件影相)。個Goods to Follow, 佢都冇問題。只係填返張form簽幾個名就做完。

搞咗三個幾鐘之後，就要出去做COVID test(randomly selected 😖）。首先要經過一個station去register返我哋嘅contact information。之後做檢測就同喺香港做差唔多冇乜大分別。唯一一個問題，就係我小朋友只係十歲喺香港未打針，所以應該係要做Day 8 test。佢哋應該要畀個home test kit我帶返屋企，我問過兩個職員都話唔需要嗰個test kit.... 🤔🤔🤔

我第二日收到份檢測報告之後, 就見到有個day 8 test嘅section for 我嘅小朋友。我唯有打返去Lifelabs, 電話教職員都好奇怪點解佢冇畀個kit我小朋友。Anyway, 佢哋最後都係搵courier send返個kit畀我哋。如果大家畀佢哋randomly selected做檢測嘅話就留意啦。

回流前賣唔到層樓點算？物業估價？

之前都同大家提到如果未賣到層樓記得搵測量師做個物業估價。如果層樓賣得高過個估價，高過估價個portion先至要比capital gain。有網友亦都提過其實唔需要測量師估價, 但係我個屋苑真係太少成交，銀行都冇網上估價做reference.

我之前亦都提過有好多間測量師公司，我最後就搵咗 Dudley Surveyors.

<純分享> 我喺佢哋個網站上面留低咗我嘅contact同埋所需要估價嘅地址，過咗一日佢哋就send返個quotation返嚟啦。層樓估價佢哋只係收$2,500，因為我連一個車位所以佢哋要多收$1,000。

我見價錢合理，我簽返張form過完錢畀佢哋，3日之後就收到份draft report喇。最後我多一個禮拜就收到佢個electric copy。嗰個form copy佢哋就搵courier send去我屋企。過程都好順利，只係用email就已經可以完成所有過程。🙏

回流前大量硬幣點處置?

最近執屋發現屋企有好多硬幣散紙, 足足儲咗兩個箱仔。啲散紙又重，去銀行入又要預先分類 （仲夾雜咗啲外幣), 真係好難處置。

我知道金管局有流動收銀車, 但係佢哋嗰幾架車每兩個星期去唔同地點, 真係好難就到時間地點。

我喺好多商場都見過有一部機叫做Dragon Coin (換幣龍)。呢部機接受所有香港流通硬幣，亦都可以直接將啲硬幣存入去你嘅銀行戶口，八達通, Alipay, etc。佢幫我處置咗所有嘅分類，但係佢需要收10%手續費。如果你將啲散紙身去慈善機構係唔需要手續費嘅。

最後我總共入咗1355個硬幣 $843.3 (after 10%$759)。真係估唔到嗰堆硬幣都幾值錢☺️

Pack箱日 - (Columbia International Removals)

終於到咗運輸公司來收箱嘅日子。約咗佢哋9:30上門佢哋9:20就已經到達啦。因為我哋需要搬一層樓梯，所以佢哋有成五六個人上嚟幫手👍

佢哋首先睇咗一次睇下有幾多嘢喺已經入咗箱同埋仲有幾多嘢係需要佢哋幫手pack。我哋仲有一個電子琴，兩幅油畫和一張凳需要佢哋幫手包裝。

佢哋真係好熟手，唔使一個鐘就已經幫我哋所有嘢pack好曬上埋車。最後總共有43件(連埋個電子琴)。佢哋亦都會幫我哋慳位，佢哋見到個琴同埋凳仲有位就幫我哋攝返啲玩具同埋衫落去等我哋用少兩個箱。🙏

跟住就要睇下啲船期幾時可以出發。😅